என் இரவுகள்!!

 

சூரியன் மறைந்ததும்

உருக்கொண்டது எனக்கான உலகம்.

பிரும்ம ராட்சதனின் கைகள் போல்

நீளும் அதன்

விரல்களில்

வித விதமான புனைவுகள்.

ஒவ்வொரு இரவும் ஒவ்வொரு

உருக்கொள்ளும் அதன் வசீகரத்தில்

பயம் அகன்ற குதூகலம்!

 

பள்ளியிலும், விளையாட்டினுள்ளும்

ஒளிந்திருந்தது,

என் அடுத்த இரவுக்கான

காத்திருத்தல்.

 

இரவுகளின் கருவெளிகளில்

சொல்லப்பட கதைகளின்

பூக்களையும், மலைகளையும்

நதிகளையும் சேகரித்து

ஒரு நந்தவனமாக்கினேன்!!

 

காலச்சரிவுகளில் எல்லாம்

மாறிப்போனாலும்

இன்னும் இரவுகளில்

விரல் பிடித்து

நுழைந்து விடுகிறேன்

எனக்கேயான அவ்வுலகில்!!